சமந்தா ரூத் பிரபு மூன்று ஆண்டுகளுக்குப் பின் திரையில் திரும்புகிறார்!

பான் இண்டியா நட்சத்திரமாக வலம் வரும் சமந்தா ரூத் பிரபு, கடந்த சில ஆண்டுகளாக உடல்நலக் குறைவு காரணமாக திரைப்படங்களில் நடிக்காமல் ஓய்வு எடுத்து வந்தார். 2023-ல் ‘குஷி’ மற்றும் ‘ஷாகுந்தலம்’ படங்களுக்குப் பிறகு முழு நீள நடிப்பில் திரையில் தோன்றவில்லை என்றாலும், ரசிகர்களின் மனங்களில் தனி இடத்தைப் பிடித்தவர்.

கடந்த 2025 டிசம்பர் மாதம், ‘தி ஃபேமிலி மேன்’ மற்றும் ‘சிட்டாடல்: ஹனி பன்னி’ போன்ற தொடர்களை இயக்கிய பிரபல இயக்குநர் ராஜ் நிடிமோருவை காதலித்து திருமணம் செய்துகொண்டார் சமந்தா. இந்தத் திருமணத்திற்குப் பிறகு, அவர் ரசிகர்களுக்கு ஒரு குட் நியூஸை அளித்துள்ளார்.

மூன்று ஆண்டுகளுக்குப் பிறகு சமந்தா நடிப்பில் உருவாகியுள்ள புதிய தெலுங்கு படம் ‘மா இண்டி பங்காரம்’ (Maa Inti Bangaram). இப்படத்தின் ஃபர்ஸ்ட் லுக் போஸ்டரை சமந்தா தனது சமூக வலைதளங்களில் வெளியிட்டுள்ளார். அதில், சேலையில் அழகாகவும், உக்கிரமான தோற்றத்துடனும் பஸ்ஸில் நின்றிருக்கும் சமந்தாவின் லுக் ரசிகர்களை கவர்ந்துள்ளது.

இயக்குநர் நந்தினி ரெட்டி இயக்கத்தில் உருவாகியுள்ள இப்படத்தின் கதையை சமந்தாவின் கணவர் ராஜ் நிடிமோரு உருவாக்கியுள்ளார். சமந்தாவின் சொந்த பேனரான டிராலாலா மூவிங் பிக்சர்ஸ் தயாரிப்பில் உருவாகியுள்ள இப்படத்தில் குல்ஷன் தேவையா, திகந்த் உள்ளிட்டோர் முக்கிய வேடங்களில் நடித்துள்ளனர்.

இப்படத்தின் டீசர் டிரெய்லர் ஜனவரி 9-ஆம் தேதி காலை 10 மணிக்கு வெளியாகும் என சமந்தா அறிவித்துள்ளார். இந்த அறிவிப்பு ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.

சமந்தாவின் இந்த கம்பேக் படம் ஆக்ஷன் கலந்த உணர்வுப்பூர்வமான கதையம்சமாக இருக்கும் என எதிர்பார்க்கப்படுகிறது. சேலையில் அதிரடி ஸ்டண்ட் காட்சிகளை தானே செய்துள்ளதாகவும் தகவல்கள் வெளியாகியுள்ளன.

ரசிகர்களே, சமந்தாவின் புதிய அவதாரத்தைப் பார்க்க ஆயத்தமாகுங்கள்!