16 ஆண்டுகளுக்குப் பிறகு இணைந்த ‘SMS’ கூட்டணி: “ஜாலியா இருந்த ஒருத்தன்” படப்பிடிப்பு நிறைவு!

தமிழ் சினிமாவில் ‘சிவா மனசுல சக்தி’ (SMS) என்ற பிளாக்பஸ்டர் படத்தின் மூலம் இளைஞர்களின் மனதைக் கவர்ந்த நடிகர் ஜீவா – இயக்குநர் ராஜேஷ் – இசையமைப்பாளர் யுவன் சங்கர் ராஜா கூட்டணி, சுமார் 16 ஆண்டுகளுக்குப் பிறகு மீண்டும் இணைந்துள்ள படம் “ஜாலியா இருந்த ஒருத்தன்”.

கடந்த சில மாதங்களாக விறுவிறுப்பாக நடைபெற்று வந்த இப்படத்தின் படப்பிடிப்பு தற்போது முழுமையாக முடிவடைந்துவிட்டது. இதனைத் தெரிவிக்கும் வகையில் படக்குழுவினர் ஒரு கலகலப்பான “Wrap-up” வீடியோவை வெளியிட்டுள்ளனர்.

‘சிவா மனசுல சக்தி’ படத்தின் அதே ‘வைப்’ (Vibe) இந்தப் படத்திலும் இருக்கும் என எதிர்பார்க்கப்படுகிறது.ஜீவாவுக்கு ஜோடியாக நடிகை இவானா நடித்துள்ளார். மேலும், பிரபல யூடியூப் நட்சத்திரம் பரிதாபங்கள் சுதாகர் முக்கிய வேடத்தில் நடித்துள்ளார்.யுவன் சங்கர் ராஜாவின் இசை படத்திற்குப் பெரும் பலமாக அமையும். எம்.சுகுமார் ஒளிப்பதிவு செய்ய, மாலிக் ஸ்ட்ரீம்ஸ் கார்ப்பரேஷன் (Malik Streams Corporation) நிறுவனம் இப்படத்தைத் தயாரித்துள்ளது.

இயக்குநர் ராஜேஷின் வழக்கமான நகைச்சுவை பாணி, ஜீவாவின் எதார்த்தமான நடிப்பு மற்றும் யுவனின் துள்ளலான இசை என ஒரு பக்கா கமர்ஷியல் எண்டர்டெய்னர் படமாக இது உருவாகியுள்ளது. படப்பிடிப்பு முடிந்துள்ள நிலையில், விரைவில் படத்தின் டீசர் மற்றும் பாடல்கள் வெளியாகும் என எதிர்பார்க்கப்படுகிறது.

அடுத்தகட்டமாக இப்படத்தின் பின்னணி வேலைகள் (Post-production) தொடங்கப்பட உள்ளன. கோடை விடுமுறை விருந்தாக இந்தப் படம் திரைக்கு வர வாய்ப்புள்ளதாகக் கூறப்படுகிறது.