ஜனநாயகன் இசை வெளியீட்டு விழா அரசியல் பேசக்கூடாது; கொடி ஏந்தக்கூடாது – மலேசிய அரசு அதிரடி!

எச். வினோத் இயக்கத்தில், அனிருத் இசையமைப்பில் தளபதி விஜய் நடித்து வரும் திரைப்படம் “ஜனநாயகம்”. விஜய்யின் திரைப்பயணத்தில் இதுவே கடைசிப் படம் என்பதால், இதன் ஒவ்வொரு அறிவிப்பும் திருவிழா போலக் கொண்டாடப்பட்டு வருகிறது. இந்நிலையில், இப்படத்தின் இசை வெளியீட்டு விழாவை மலேசியாவில் நடத்தப் படக்குழு திட்டமிட்டுள்ளது.

இதற்கான அனுமதியை வழங்கிய மலேசிய அரசு, தமிழக அரசியல் சூழலைக் கருத்தில் கொண்டு சில மிக முக்கியமான கட்டுப்பாடுகளை விதித்துள்ளது.

மலேசியத் தமிழர்கள் மற்றும் விஜய்யின் ரசிகர்கள் பெரும் திரளாகக் கூடுவார்கள் என்பதால், சட்டம்-ஒழுங்கு மற்றும் நாட்டின் அமைதியைப் பேணும் வகையில் பின்வரும் நிபந்தனைகள் விதிக்கப்பட்டுள்ளன இந்த விழா ஒரு பொழுதுபோக்கு மற்றும் சினிமா சார்ந்த நிகழ்ச்சியாக மட்டுமே இருக்க வேண்டும். மேடையில் பேசுபவர்கள் எக்காரணம் கொண்டும் அரசியல் பேசக்கூடாது.

தமிழக வெற்றிக் கழகத்தின் (TVK) கொடிகள், அக்கட்சியின் சின்னம் பொறித்த டி-ஷர்ட்கள், அல்லது கட்சி சார்ந்த துண்டுகளை ரசிகர்கள் அணிந்து வரவோ, ஏந்தி வரவோ கண்டிப்பாக அனுமதி இல்லை.

விழா அரங்கிற்குள் அரசியல் சார்ந்த கோஷங்களை எழுப்பக் கூடாது. இது முழுக்க முழுக்க கலை நிகழ்ச்சியாக மட்டுமே நடைபெற வேண்டும்.இந்த நிபந்தனைகளை மீறும் நபர்கள் மீது மலேசியச் சட்டப்படி கடும் நடவடிக்கை எடுக்கப்படும் என்றும், தேவைப்பட்டால் விழா பாதியிலேயே நிறுத்தப்படும் என்றும் எச்சரிக்கப்பட்டுள்ளது.

தளபதி விஜய் முழுநேர அரசியலில் இறங்கியுள்ள நிலையில், அவரது பட விழாக்கள் அரசியல் மாநாடு போல மாறி வருவதை நாம் கண்டுள்ளோம். மலேசிய மண்ணில் வெளிநாட்டு அரசியல் தலையீடுகள் அல்லது அரசியல் ரீதியான மோதல்கள் ஏற்படுவதைத் தவிர்க்கவே அந்த நாட்டு அரசாங்கம் இத்தகைய முன்னெச்சரிக்கை நடவடிக்கைகளை எடுத்துள்ளதாகக் கூறப்படுகிறது.

மலேசிய அரசின் இந்த அறிவிப்பு விஜய் ரசிகர்களிடையே கலவையான உணர்வுகளை ஏற்படுத்தியுள்ளது. “தலைவரைப் பார்க்கப் போகிறோம் என்பதே மகிழ்ச்சி, ஆனால் உணர்ச்சிகளை வெளிப்படுத்தக் கட்டுப்பாடுகள் இருப்பது சற்று வருத்தமே” என ரசிகர்கள் சமூக வலைதளங்களில் பதிவிட்டு வருகின்றனர். இருப்பினும், படக்குழுவினர் இந்த நிபந்தனைகளுக்கு உட்பட்டு விழாவைச் சிறப்பாக நடத்தத் திட்டமிட்டுள்ளனர்.