சென்னையில் அதிர்ச்சி: அடையாறு ஆற்றில் குதித்து பிரபல தமிழ் திரைப்பட தயாரிப்பாளர் கே.ராஜன் தற்கொலை!

தமிழ் திரையுலகின் மூத்த தயாரிப்பாளரும், விநியோகஸ்தருமான கே.ராஜன் (வயது 85) சென்னையில் அடையாறு ஆற்றில் குதித்து தற்கொலை செய்து கொண்ட சம்பவம் ஒட்டுமொத்த சினிமாத்துறையினரையும் அதிர்ச்சியில் ஆழ்த்தியுள்ளது.

ஞாயிற்றுக்கிழமை மாலை, தனது ஓட்டுநருடன் காரில் புறப்பட்ட கே.ராஜன், சென்னை அடையாறு திரு.வி.க பாலம் அருகே காரை நிறுத்தச் சொல்லியுள்ளார். சற்று நேரம் காலாற நடந்து வருவதாக ஓட்டுநரிடம் கூறிவிட்டுச் சென்ற அவர், எதிர்பாராத விதமாக திடீரென பாலத்தின் மீதிருந்து கீழே பாய்ந்துள்ளார்.

இதனைப் பார்த்து அதிர்ச்சியடைந்த அங்கிருந்த பொதுமக்களும், ஓட்டுநரும் உடனடியாகக் காவல் துறை மற்றும் தீயணைப்புத் துறையினருக்குத் தகவல் தெரிவித்தனர்.

தகவல் அறிந்து சம்பவ இடத்திற்கு விரைந்து வந்த சைதாப்பேட்டை தீயணைப்பு மற்றும் மீட்புப் படையினர் ஆற்றில் தீவிர தேடுதல் வேட்டையில் ஈடுபட்டனர். மாலை சுமார் 5.15 மணியளவில் கே.ராஜனின் உடல் மீட்கப்பட்டது.

அவரது உடல் பிரேதப் பரிசோதனைக்காக ராயப்பேட்டை அரசு மருத்துவமனைக்கு அனுப்பி வைக்கப்பட்டது. இந்தத் துயரச் செய்தியை அவரது மகன் பிரபுகாந்தும் உறுதிப்படுத்தியுள்ளார்.

85 வயதான மூத்த சினிமா ஆளுமை ஒருவர் இந்த விபரீத முடிவை எடுத்ததற்கான காரணம் என்ன என்பது குறித்து அடையாறு காவல் துறையினர் வழக்குப் பதிவு

முதற்கட்ட விசாரணையில், கடந்த சில நாட்களாக அவர் குடும்பப் பிரச்சினை காரணமாக மிகுந்த மன உளைச்சலில் இருந்ததாகக் கூறப்படுகிறது.அவர் ஏதேனும் கடிதம் (Suicide Note) எழுதி வைத்துள்ளாரா என்றும் போலீசார் சோதனை செய்து வருகின்றனர்.

1980-களின் தொடக்கத்தில் இருந்து தமிழ் சினிமாவில் தீவிரமாக இயங்கி வந்தவர் கே.ராஜன்.

தயாரிப்பு மற்றும் இயக்கம்: ‘கணேஷ் சினே ஆர்ட்ஸ்’ நிறுவனம் மூலம் ‘பிரம்மச்சாரிகள்’, ‘டபுள்ஸ்’, ‘அவள் பாவம்’ உள்ளிட்ட பல படங்களைத் தயாரித்துள்ளார். அப்பாஸ் மற்றும் குணால் நடித்த ‘உணர்ச்சிகள்’ என்ற திரைப்படத்தை இயக்கியும் உள்ளார். அஜித்தின் ‘துணிவு’, செல்வராகவனின் ‘பகாசூரன்’ ஆகிய படங்களில் நடிகராகவும் முகம் காட்டியுள்ளார்.

சென்னை திரைப்பட விநியோகஸ்தர்கள் சங்கத்தின் தலைவராகப் பொறுப்பு வகித்த இவர், சினிமா மேடைகளிலும், யூடியூப் நேர்காணல்களிலும் யாருக்கும் அஞ்சாமல் வெளிப்படையாகப் பேசக்கூடியவர்.

“பெரிய நடிகர்கள் தங்களின் கோடிக்கணக்கான சம்பளத்தைக் குறைத்துக் கொண்டால்தான் சிறு தயாரிப்பாளர்களும், சாதாரண சினிமா தொழிலாளர்களும் பிழைக்க முடியும்” என்று முன்னணி நடிகர்களை நோக்கித் தொடர்ந்து மேடைகளில் சாடி வந்தவர். சினிமா தலைப்புகள் தமிழில் தான் வைக்கப்பட வேண்டும் என்பதில் உறுதியாக இருந்தவர்.

கே.ராஜனின் திடீர் மறைவுக்குத் தமிழக முதல்வர் மு.க.ஸ்டாலின், அதிமுக பொதுச்செயலாளர் எடப்பாடி பழனிசாமி மற்றும் திரையுலகைச் சேர்ந்த பிரபலங்கள், தயாரிப்பாளர்கள், நலிந்த தொழிலாளர்கள் எனப் பலரும் தங்களின் ஆழ்ந்த இரங்கலைத் தெரிவித்து வருகின்றனர். சிறு தயாரிப்பாளர்களின் நலனுக்காகத் தொடர்ந்து ஒலித்து வந்த ஒரு தைரியமான குரல் இன்று மௌனமாகிவிட்டது என்று திரையுலகினர் சோகத்தில் மூழ்கியுள்ளனர்.

உதவி எண்கள்: மன உளைச்சலோ அல்லது தற்கொலை எண்ணங்களோ தோன்றினால், தமிழக அரசின் சுகாதார உதவி எண் 104 அல்லது சினேகா தற்கொலை தடுப்பு உதவி எண் 044-24640050 ஆகியவற்றைத் தொடர்பு கொண்டு ஆலோசனை பெறலாம்.