சித்தர்கள் போதனை எப்படி மனிதர்களுக்கு உதவுது? சித்தர்தாசன் செல்வகுமார் விளக்கம்!
ஆனி 25, 2025 Published by anbuselvid8bbe9c60f
சென்னை: சித்தர்கள் யார், அவர்களின் போதனைகள் மனிதர்களுக்கு எப்படி உதவுகின்றன என்பது குறித்துப் பலரும் அறிய ஆர்வமாக உள்ளனர். இது குறித்து சித்தர்தாசன் செல்வகுமார் ஐயா அவர்கள் ஆன்மீகக்ளிட்ஸ்க்கு அளித்த சிறப்புப் பேட்டியில் விரிவாகப் பேசினார். அவரது கருத்துக்களின் தொகுப்பு இதோ:
சித்தர்கள் – நம் முன்னோர்கள்:
சித்தர்கள் என்பவர்கள் 2000 ஆண்டுகளுக்கு முன்பு மனித உடல் எடுத்து வாழ்ந்த சிவனுடைய அம்சம். அவர்கள் எங்கேயோ, எப்போதோ வாழ்ந்தவர்கள் என்று நினைக்காமல், அவர்கள் நம் மூதாதையர்கள், முன்னோர்கள், தாத்தா என்று நினைத்து வழிபடுங்கள். அப்போது அவர்கள் உங்களுக்கு உறுதுணையாக இருப்பார்கள்.
சித்தர்களின் போதனைகள்:
சித்தர்கள் சாஸ்திர சம்பிரதாயங்களுக்கு அப்பாற்பட்டவர்கள். அவர்களை நம் குடும்பத்தில் ஒருவரை வழிபடுவது போல வணங்கலாம். அவர்கள் சொன்ன போதனைகளில் முக்கியமானது, பெற்றோர்களை மதிக்க வேண்டும், மனைவி அல்லது கணவனுக்கு உண்மையாக இருக்க வேண்டும், குழந்தைகளுக்கு நல்ல பெற்றோராகவும், உடன் பிறந்தவர்களுக்கு நல்ல சகோதரராகவும் இருக்க வேண்டும்.
சித்தர்களின் வழிபாட்டு முறைகள்:
சித்தர்களின் வழிபாடு என்று சொன்னாலே தியானம்தான் நினைவுக்கு வரும். அவர்களின் சமாதி முன்பு தியானம் செய்வது மன அமைதிக்கு வழிவகுக்கும். தியானத்தை நம் உடல் சக்திக்கு ஏற்றார் போல செய்தாலே போதுமானது. கண்களை மூடி, அமைதியான இடத்தில் உட்கார்ந்து எதை பற்றியும் நினைக்காமல் தியானம் செய்வது சிறந்தது. மனம் ஒரு குரங்கு போல அலைபாயும். அதை கட்டுப்படுத்த நினைக்காமல், அதன் போக்கிலேயே விட்டுவிடுங்கள். பின்னர் அது தானாக கட்டுக்குள் வரும். உங்களுக்குப் பிடித்த பூக்களை கையில் வைத்து தியானம் செய்யலாம்.
தியானத்தின் மூலம் என்ன செய்ய முடியும்?
தியானத்தின் மூலம் எதை வேண்டுமானாலும் செய்ய முடியும். ஒரு பட்டுப்போன மரத்தை துளிர்க்க வைக்க முடியும். மழை பெய்ய வைக்க முடியும். நோய்களுக்கான மருந்துகளைக் கூட தியானத்தின் மூலம் அறியலாம்.
பணம் சம்பாதிக்க சித்தர்கள் சொன்னது என்ன?
சித்தர்கள் ஏடிஎம் மெஷின் இல்லை. அவர்களை வணங்கினால் உடனடியாக பணம் வரும் என்று நினைக்காதீர்கள். அதற்கு பதிலாக, பணம் சம்பாதிப்பதற்கு உண்டான தெய்வங்களை வணங்கலாம். பழனி மலையில் விஸ்வரூப தரிசனம் பாருங்கள். அது இடத்தால் பாதிக்கப்பட்டவர்களுக்கு, வம்பு வழக்குகளில் மாட்டிக்கொண்டவர்களுக்கு, வியாதியிலிருந்து விடுபட நினைப்பவர்களுக்கு ஒரு சிறந்த பரிகாரமாகும். பணம் வேண்டுமென்றால் திருப்பதிக்கு சென்று கொங்கணர் சித்தரை வணங்குங்கள்.
பண வரவிற்கு எளிய பரிகாரம்:
அரச மரத்தின் இலையை எடுத்து, அதில் உங்கள் பிறந்த தேதி, மாதம், வருடம் ஆகியவற்றை சந்தனத்தில் எழுதுங்கள். உங்கள் பெயர் மற்றும் ராசி நட்சத்திரத்தை கீழே எழுதுங்கள். பச்சை கற்பூரம் வைத்து, அருகில் உள்ள கோவிலுக்குச் சென்று, பச்சரிசி மாவினால் கோலமிட்டு, அதில் ஒரு ரூபாய் நாணயம் வைத்து வழிபடுங்கள். பின்னர் அந்த நாணயத்தை பூஜை அறையில் வைத்து வணங்குங்கள்.
சித்தர்கள் நமக்கு நல்ல வழிகாட்டிகளாகவும் நண்பர்களாகவும் இருக்கிறார்கள். அவர்களை முறையாக வழிபட்டு, அவர்கள் சொன்ன நல்ல விஷயங்களை பின்பற்றினால், வாழ்க்கையில் முன்னேற்றம் அடையலாம்.
மேலும் இது போன்ற ஆன்மீகம் மற்றும் ஜோதிடம் சார்ந்த தகவல்களைப் பெற, எங்களது Indiaglitz.com தளத்துடன் இணைந்திருங்கள்.
